كانت هذه القصيده مشاركه مني في حفل معايدة الأهالي
بمناسبة عيد الفطر المبارك للعام 1427هـ
بأبتـدي بذكرك إلهي يا إله العالمـين ..... واحد معبـود سبحـانه عظيم الشـاني
من عقب مالقي التحيه والمصافح باليمين ..... جيت اهني جمعة الأحباب في الميـداني
واقفٍ كلي شموخ ومحتـرم هالسامعين ..... ناظمٍ حرف القصيـد وكاتـب العنواني
جيت اهني بعيدكـم يالقائمين الصايمين ..... من عقب شهر الصيـام ولذة الإيمـاني
للأثر في غرّة جبـاه العبـاد الساجدين ..... للطهـاره في جبين العـابد الربـاني
للقلـوب اللي تقـوم الليل وكلٍ نايمـين ..... للعبـاد اللي لهم في الشهـر عالم ثـاني
بين مصحف يتلو القرآن وبين المنفقـين ..... سطّر اسمه في سجل اهل الزمان الفاني
وبعدها بأوسط خفوقي يشتعل بي جمرتين ..... جمـرة من فعـل جاهل حاقـدٍ شرّاني
من رسم رسم يشبـه به رسول المرسلين ..... سيدي تفديـه روحي ومرخصٍ ولـداني
تََبْ ياكافر يعلّ السيف يقطـع هاليـدين ..... ولايدنس عرض سيّـد من نسل عدنـاني
دون عرضك يانبـي الله نقـوم مجاهدين..... معلنين محبتـك مابين قاصيهـا وداني
ومن تهـزى بديننـا بنقول لا للعابثـين ..... كيف نرضى فعلك وياكيف صرت الجاني
لا يغرركم جهل زمره تعدوى حاقديـن ..... همهـا تنصر دعـاوي زمرة الشيطـاني
ارجعـوا للديـن والله قابـلٍ التائبـين ..... مايـرد اللي سجـد له تائـبٍ ندمـاني
وجمرة اخرى يحس ابها جموع العابدين ..... في بقاع الأرض صنعة حاقـدٍ شيطاني
حرب عشواء تاكل الأخضر بدارالمسلمين ..... قصدها عزت شموخ الديـن في الأوطاني
كم عزيزٍ ممسي والصبح يصبح به سجين ..... وكم شبابٍ في الإسر يشكون من حرماني
كم يتيـمٍ مالقـا له في ديـاره من معين ..... دمعتـة عالخد تسبـق عبـرة الصبيـاني
والثكالا يصرخن بالصوت وين السامعين ..... من يـداوي هالجروح ويحرس البيبـاني
والمساجد هدّمت فوق الرجـال الراكعين ..... والمصـاحف قطعت يا والله الخسـراني
لا وربي مايفـوز اهل الطغـاة الغاصبين ..... دام رب الكون معنـا فديننـا منصاني
وكلمتي لأهل البـلاد العادلين الحاكمين ..... اهل حكـام الجزيـره عاليـين الشـاني
دار ابو متعب يلوذ ابها الرجـال الخائفين ..... من شكى ضيق اليـدين وجورة الأزماني
عشت ياحاكـم بلادي يا إمـام المسلمين ..... خـادم البيتـين فعلك بان في الميـداني
كم ضعيف اغتنى بك عقب شكوى الداينين ..... وكم يتيـمٍ ماشكى في فيّـتك حرمـاني
من كرم جودك بشهرالخير اطلقت السجين ..... فاتحٍ باب السعـاده من عقـب سجّـاني
وكيف ننسى دمعتينك يوم تحضن باليدين ..... بنت هذاك الشهيـد اللي فدا الأوطـاني
ياعسى يالله يحفظك ويمد لك عمرك سنين ..... ويجزيك عن كل فعل بجنـة الرحماني
القلوب لسيـدي مشعل تزف العـايدين ..... الكريـم اللي بمد الكف كم حقق اماني
في دروب الخير له دربٍ وحنّـا شاهدين ..... كم بنى لله مسجـد رافعٍ صـوت الأذاني
ولكتاب الله يشجّـع هالشبـاب الحافظين ..... الجوائـز ما تعـدد مابهـم خسـراني
كفّـه اليسرى امانه ماتعرفـك ياليمـين ..... لين مدّت منفقـه ترجي الجزا الربـاني
كيف نحصي له فعايل في الخفا لاماتبين ..... بان من فعلـه قليـل ورجّـح الميـزاني
وجيرته مكسب وحنّـا بجيرته مطمنين ..... فاتـحٍ قلبـه قبـل يفتـح لنـا البيبـاني
وسيدي عبدالعزيز الشبل في ذاك العرين ..... شارب كاس الفعول الطيبه من قلب حاني
الكريم ابن الكريم اللي به الدنيـا تزين ..... تبتسم من طيب فعله كل قاصيهـا وداني
كم دعم حفل المعايد دافع الشي الثمـين ..... من كرم جوده ظهر هالحلم .. بيّن للعياني
يا إلهي كان لي دعوه تجاب في كلمتين ..... تجزي الخيّـر بخيـر وسكّنـه بجنـاني
ومن دعم حفل التواصل كلنا له شاكرين ..... ياعسى المولي يجازيهـم بزود احساني
ومن رعاه اليوم حاضر ياعساهم سالمين ..... شرفونـا بالحضـور وقلبنـا فرحـاني
والشباب اللي على حفل الأهالي قايمـين ..... بارك الله في فعلهـم جمعـة الإخـواني
بهالحضور اللي سعدنا اجتمعنـا محتفين ..... نعلن الفرحـه قصيـد ونكتب القيفـاني
واعذروني كيف اوفّي حقكم في كلمتين ..... واصفحوا عني الخطأ لو زل فيه لسـاني
واسأل الله يختـم الأعمال بالصفح المبين ..... ويجعل الجنـه قـرار ويكتب الغفـراني
الإله اللي سجدنـا له ونبكي طالبـين ..... رحمته والعتـق نسـأل ربنـا المنـاني
والختم صلوا على اللي مرسلٍ للعالمـين ..... الرسول اللي مبلـغ دعـوة الرحمـاني
* * * *
اتمنى ان تنال على اعجابكم
" بكم يكتمل عقد الإبداع "
وتقبلوا خالص التحيه
اخوكم / سلمان بن عبدالله البريدي