علني توي صغير وفي سن الطفولة ويمكن في سن الرضاعة قياساً على عمر نوح عليه السلام اللي خلف حول ست مليارات آدمي منهم ثمنتعش مليون سعودي وخمس الف عرقاوي لكن الحجاج بن عرقة ما له الا ولدين اسال الله يرزقني ست بلايين ريال مهوب آدمي ونذرا علي احط لكم مسابقة يالاعضاء يومية والجايزة الف ريال ؟! والف ريال كل يوم شوية في حققكم لكن ابي اقهر ابو الحارث وجايزته . المهم ان حياتي الجميلة القصيرة اللي صادقت فيها انواع من البشر تشفع لي اصنف الصداقة على الوان الاشارة وابين لكم عيوب وعلاقة كل لون مع الآخر ، وليه صنفتهم على الوان الاشارة ؟!!! لان الون اللحمر خط ويجب التوقف عنده والبرتقالي ممكن توقف وممكن تمشي اما الاخضر فهو الامان يعني ما عليك خطر لكن انتبه لا يطلع عليك حمراوي او خضراوي من شارع فرعي ثم يغير لونك !!! واليكم التصنيف :
صداقة حمراء واعضاءها حمراويين
صداقة برتقالية واعضاءها برتقاليين
صداقة خضراء واعضاءها خضراويين
الحمروايين يعيشون حياة صداقية مستقرة ما فيها مشاكل ولا طقاق لانها برعاية ابليس فما فيه احد يحرش بين اعضاءها ولكن الخبيث يزين لهم فيطيحون في جميع انواع الذنوب ، شارب وحبوب وقنوات واهم شي عندهم البسطة ، وهذولا ما لهم اي التزامات عائلية واهلهم متوذين منهم ولا يسالونهم وين رحتم ولا وين جيتم والمتزوج فيهم تخاف من زوجته ، وبيني وبينكن الحمراويين يحبون بعض وكل يوم مع بعض وهي اكثر الصداقة ترابط ، يسرقون ويذنبون مع بعض ولا احد يورط احد يدخلون السجن سوى ويطلعون سوى واذا نجى منهم احد ما يعلمون عليه ، اما الصلاة فهي حسب المزاج ولا عندهم شيء اسمه قضاء يعني ممكن يصلي فرض ويترك خمس ، والحمروايين يحسبون انفسهم سعداء وانهم يعيشون في نعيم وغيرهم يضحكون عليه لانه ما عرف الحياة الحمراوية ، وعلى فكرة الحمراويين يمكن يناسبون البرتقاليين ولكن ما يحبون الخضراويين لنهم يخافون منهم يخربون عليهم حياتهم ولكن احيانا يستانسون معهم خاصة اذا كان الخضراوي خفيف دم .
اما البرتقاليين فهم مساكين ما طاحوا صح في الفساد ولا هم طاحوا في الطوع ، وهم مقبولين لعامة الناس فان جوا مع الحمراويين غنوا وان جوا مع الخضراويين صلوا ، وعشان ما اظلمهم تراهم يحبون الصلاة ولكن يتساهلون فيها وهم كل يوم في طلعة وبر وسفر ، يحبون الوناسة والتعليق وكثير ما يقع بينهم طقاق ينتهي بالصلح ، وهذولا البرتقاليين مثل ما يقولون فراشه في سيارته واذنه معه ما عليه من زوجته ولا امه ، وهم صح مهتمين باسرهم ولكن الصداقة اهم عندهم ومصيبة البرتقاليين ان سفراتهم كثيرة وطلعاتهم للاستراحات والبر وآخر الطريق كثيرة والمطاعم تعرفهم وهذا ما يخليهم آخر الشهر طفرانين ، والبرتقاليين ما عندهم مانع يدخل معهم واحد حمراوي ولكن يخافون منه لا يوقعهم في مشكلة ، اما يشرب عندهم او يلهم كم حبة او حتى يغشهم ويوكلهم حبوب لان الحمراوي خبل ما يهمه احد ووده كل الناس مثله والبرتقاليين يستانسون مع الخضراويين ولكن ما يكثرون منهم لانهم يحبون الانبساط والتعليق والحش واللي مزين البرتقاليين انهم حبايب طيبين يزعلون بسرعو يتراضون بسرعة .
اما الخضراويين فهم الصفوة وهم الجليس الصالح كما يسمون انفسهم ، ما عندهم الا قال الله وقال رسوله والضحك عند بعضهم عيب وبعضهم فيه وناسة وميزتهم انهم يحبون الخير للحمراويين والبرتقاليين ، ومجالس الخضراويين يقبل فيها كل برتقالي ولكن الحمراوي غير مرحب به لانهم يرونه منتهي ما فيها حل وعيب الخضروايين انهم احزاب يعني كل الخضراويين منقسمين الى شعب خضراء لذلك تجد سواليفهم جانبيه لذلك اذا دخل معهم حمراوي او برتقالي يضيق صدره لانه يحس ان ما فيه احد معطيه وجه وكود واحد ينتبه له ثم يساله عن حاله وعن امه وعياله حتى ولو انه قد ساله من قبل ، ويستمر الحديث الجانبي الين تاتي المحاضرة او يبدا البرنامج الثقافي . الخضراويين قلنا انهم احزاب كل مجموعة مع بعض تلقاهم يسون اجتماعات جانبية وسفرات جانبية وانت ما تدري عنهم وهذا بعكس الحمراويين والبرتقاليين اللي هم دايم مع بعض وقليل يتخلف منهم احد ، وزيادة على عيب التحزب ان الخضراويين اجتماعتاهم مجدولة يعني ممكن تقعد شهر ما شفت منهم احد ويمكن يطوف عليك سنة او اكثر ما شفت بيت واحد منهم او شاف بيتك وربما بعضهم يضيع موقع بيتك لان اجتماعاتهم عادة تكون في الاستراحة او البر والبيوت لا يمكن ن والحقيقة ان الخضراويين يوفرون عليك وقت فهم يحبون الجلوس في البيت واهلهم خاصة زوجاتهم مبسوطين منهم لانهم دايم في البيوت . عاد فيه عيب خطير عند الخضراويين وهو انهم ما ينسون الخطأ وممكن يكرهونك على طول اذا اخطيت لان ابليس مخيم عندهم يتحرى اي مشكلة يدخل فيها ولا بعد فيهم حب المنافسة الى درجة الحقد على بعض .
أنا من خلال تجربتي في الحياة القصيرة اشوف ان الصداقة بمختلف الوانها ما عاد تنفع والربحان الابيضاني راعي ( شد ارضك ابرك لك ) وهو اللي يطلق عليه ( بيتوتي ) اللي ما له اصدقاء يكثر منهم بركة يشوفهم في المناسبات والاعياد ولا يهمك اذا قالوا الجليس الصالح !!!!!!!!! هذاك اول .
والسلام ولا احد يزعل .
سوال للاعضاء : ما لونك الصداقي ؟