أولا السلام عليكم و رحمة الله و بركاته
كيفكم يا أهل عرقة
طبعا انا ساكن جديد في عرقة و صراحة اعجبني الحي و خاصة موقعه المميز
و عندي بعض الملاحظات اتمنى تعطوني رايكم فيها
- البقالات ما توجد الا على طريق مشعل و الخط الثاني اللي جهة المستشفى و الابراج ما فيه الا بدايته.
و صراحة انا ساكن قريب من مدرسة البنات الجديدة و مشكلة البقالة بعيدة ما فيه الا طريق الامير مشعل أو بداية الابراج بس يعني تطق مشوار عشان خبز و لا عشان ببسي.
- ليش ما فيه مطبات على طريق الامير مشعل و خاصة اللي عند المدرسة.
فيه ناس تمشي مشي مو صاحي على الخط و تقول كانه بيقلع، لو على السيارات تهون بس كلكم تشوفون حتى شركة الجزيرة و خلاطاتها و تريلاتها كم يمشون مع الخط.
دايم القى بنات مع امهم او توهم طالعين من المدرسة و يوقفون على الجزيرة لين حضرته يهدي السرعة
انا اشوف لو يصير فيه مطبات زي الدرعية بتنفعنا كثييييييير و اللي بيجي مسرع و ياكلها سيارته بتقلع في الهواء و تتكسر و بعدها يحرم يسرع مرة ثانية.
على الأقل اذا لقيتوا الحريم بيقطعون الخط عرض في الخط و دق فلشر و خلهم يمشون.
- ليش ما يصير تفتيش على طريق الامير مشعل من المرور او من شرطة عرقة او المرور السري عشان يضبطون السرعة.
- مخلفات البناء ليش ما تزال من قبل بلدية عرقة؟؟؟؟ او على الاقل اللي ما يشيلها عطوه غرامة. جنبنا واحد مخليها من زمان و الى الان ما شالها و مشوهة منظر البيت. وين البلدية عنهم
- غريبة عرقة على كبرها ما شاء الله و راح تكبر بعد افتتاح الدايري الجديد ما فيها الا ثانوية واحدة للعيال و واحدة للبنات. صح فيه مجمع جديد للبنات ب ما راح يكفي، ليش ما فيه مجمع ثاني و ثالث للعيال؟؟؟؟
- البلدية ليش تردم الحفر صراحة فيه اراضي رفيييييعة مرة و اتوقع انكم عرفتوا مكانها لو يطيح فيها واحد ما ادري وش راح يصير له و هي غرب عن القصر اللي لونه زهري.
- ما فيها مقهى نت الا واحد في عرقة القديمة و زحمة و دخاااااااان كله.
- ليش ما فيه جوامع في الجهة الشمالية من طريق الامير مشعل كلها في الجهة الجنوبية. يعني جهة المستشفى المهجور ما فيها.
- اغلب المساجد في عرقة عبارة عن صنادق؟؟؟
- السؤال اللي محيرني لييييييش تم نقل بلدية عرقة؟؟؟؟؟ اتمنى احد يجاوبني
- البوكلينات و الدركترات تبدا شغل من بعد صلاة الفجر الى الساعة خمس العصر و قل سلام على الراحة النفسية و على النوم و اذا حفروا تحس انهم يحفرون في راسك.
- ليش ما يصير فيه بطولات للشباب من تنس و بلياردو و كورة قدم او سلة او طائرة؟؟؟
- مركز الاميرة لطيفة بنت فهد هل تعرفون عنه شيء؟؟؟ و هل لهم نشاطات في عرقة؟؟؟ و اللي ابي اعرفه هذا المركز مسؤول عن ايش يعني وش يشتغل فيه؟؟؟
- ليش اغلب المديورات في عرقة مغلقة بصبات؟؟؟ هل السبب انو صار فيها حوادث؟؟؟؟ مثل اللي عند المستوصف الاهلي و اللي عند مبنى البلدية قبل ما ينقل.
- و هذي المشكلة مزعجتني و رافعتن ضغطي و خاصة حارتنا و يمكن الحارات الثانية القريبة من الوادي الننننننامووووس لعب فينا وين البلدية ما يرشون و خاصة الايام هذي اعوذ بالله كثرت النواميس.
و اخيييرااااا انتو دريتوا عن هذا الخبر ؟؟؟؟؟
جار لنا صار له اطلاق نار في بيتهم و جت الطلقات في الدور الثاني على غرفة من الغرف يوم الخميس اللي فات الصباح و الناس نايمين؟؟؟؟؟!!!!!! و مو اي سلاح السلاح كان رشاش و الطلقات متفجرة و حارقة لان كان فيه مشكلة بين اللي اطلق النار وولد راعي البيت وين حنا عايشين فيه لهالدرجة وصل التسيب ان شاء الله يمسكون اللي سوى هالفعل و لو اني مكانهم و الله ما اتنازل عنه